O coordinador do BNG en Noia, Ricardo Suárez, e máis a parlamentaria nacionalista da Pobra do Caramiñal, Rosana Pérez, compareceron este martes 7 de outubro ante os medios de comunicación, na contorna da ría noiesa, para reclamar de urxencia o saneamento integral da ría e a solución inmediata dos problemas na depuración das augas residuais que se xeran ó longo de todo o municipio, augas que segundo lembraron “van parar directamente ó mar sen pasar pola EDAR (que non está operativa)”.
Engadiron que “levaremos de novo ao Parlamento esta situación, co finalidade de garantir, coa máxima urxencia posíbel, actuacións concretas que aporten solucións a este grave problema medioambiental”.
Tamén anunciaron que pedirán á Xunta “a realización dun calendario de actuacións e de investimentos para reverter esta situación, incluíndo mesmo no orzamento do próximo ano diferentes partidas para a consecución do tan saneamento integral da ría”.
Sinalaron que “os responsábeis desta situación son o Goberno noiés de Santiago Freire e máis a Xunta, por non ter sido quen de poñerlle solución”.
