O PSdeG-PSOE mostrouse este venres 10 de outubro moi crítico co servizo de transporte escolar adaptado da Xunta de Galicia, un servizo que, sinalaron, “está a obrigar que alumnos e alumnas con diversidade funcional abandonen as clases antes de tempo para poder facer uso do mesmo”.
O deputado socialista no Parlamento galego Aitor Bouza fíxose eco do caso dun alumno do CEIP Alexandre Rodríguez Cadarso de Noia que ten recoñecida unha discapacidade do 100% e que, segundo reflectiu, “vese obrigado a abandonar a súa clase 30 minutos antes da hora oficial”.
Bouza cualificou a situación de “novo ataque aos dereitos fundamentais” por parte da Consellería de Educación, e indica que é “culpa da neglixente xestión que fai a Xunta de Galicia” do servizo de transporte escolar. “Ante isto, dende o Partido Socialista non imos ficar impasíbeis, imos exixir de inmediato, a través dunha batería de iniciativas que presentamos no Parlamento de Galicia, que se garanta o dereito do alumnado con discapacidade que é usuario do transporte a asistir á totalidade do horario lectivo”, sinalou, engadindo que esixirá “que se adopten todas as medidas organizativas necesarias para que ningún alumno ou alumna teña que abandonar o centro antes da hora oficial de saída”.
“Evidentemente, tamén esixiremos que se revise o funcionamento e os contratos das empresas concesionarias do transporte adaptado e que se asegure que esa organización priorice sempre os dereitos educativos do alumnado e non criterios de conveniencia empresarial”, apuntou, ao tempo que dixo que é a súa intención reclamar á Consellería de Educación que “dea resposta ás familias afectadas, que se estableza un protocolo especifico para que se resolvan todas estas cuestións”, apunta o socialista.
