Xa se coñecen os gañadores do concurso xuvenil RiArte: Arte para protexer a ría, impulsado polo colectivo ambiental e cidadá Noia Limpa. As obras seleccionadas serán pintadas nos sumidoiros de Noia este venres 10 e sábado 11 de outubro.
RiArte, como lembraremos, é un proxecto artístico e ambiental que transformará os sumidoiros de Noia en pequenas obras de arte con mensaxes a favor do coidado da ría de Muros e Noia e a natureza en xeral.
As intervencións realizaranse en diferentes puntos da vila este venres 10 de outubro, de 10:30 a 14:00 horas, e o sábado 11 de outubro, a partir das 12:00 e seguirán pola tarde,
Os dez deseños gañadores do concurso, elaborados por mozos e mozas de entre 16 e 30 anos, terán como fío condutor a protección da natureza en xeral, e o respecto polo medio mariño. Noia Limpa explica que “cada pintura busca lembrar que todo o que cae nun sumidoiro remata no mar, e que cada xesto conta para manter limpa a nosa ría”.
A iniciativa convida á cidadanía, especialmente á mocidade, a tomar conciencia sobre o impacto do lixo urbano e a participar activamente na súa redución a través da arte e a creatividade. O proxecto tamén pretende embelecer as rúas de Noia e promover unha mensaxe positiva de sustentabilidade e responsabilidade ambiental.
Nesta primeira edición, o proxecto contará tamén coa participación especial do artista convidado Samu Piñeiro, recoñecido grafiteiro de 15 anos e unha das promesas máis destacadas da arte urbana en Galicia.
RiArte, concienciando á mocidade do coidado da contorna
RiArte é un proxecto impulsado pola asociación Noia Limpa, coa colaboración da Consellería de Xuventude da Xunta de Galicia e o Concello de Noia. O seu obxectivo é “unir arte e conciencia ecolóxica, transformando os sumidoiros en pequenas ventás de reflexión sobre o coidado da ría e a natureza en xeral”, explican dende a asociación, engadindo que a través desta acción “búscase que a mocidade se implique na protección do medio e comprenda que cada debuxo pode inspirar un cambio real no comportamento ambiental da comunidade.
