O Concello de Muros presentou a súa programación polo 25N, Día Internacional para a Eliminación da Violencia contra as Mulleres, con diferentes actividades para públicos de todas as idades.
“Será un mes para concienciar e dicir ben alto que non podemos dar pasos cara atrás”, afirmou Maruxa Martínez, concelleira de Igualdade de Muros, que debullou a axenda do 25N con Elvira Núñez, asesora xurídica do Centro de Información á Muller (CIM) de Muros.
“Vemos con preocupación os datos que confirman un aumento das denuncias por violencia machista, especialmente na xente máis nova”, engadiu Martínez.
Na mesma liña falou a alcaldesa de Muros, María Lago, que advertiu “das voces que restan importancia a unha lacra social como é a violencia machista, que require unidade de acción de toda a sociedade”.
A programación comeza o 9 de novembro cun obradoiro de defensa persoal feminina, mentres que o 18 chegará a presentación do libro As tolas que non o eran. Mulleres no manicomio de Conxo 1885-1936, con Carmen V. Valiña.
As actividades coa comunidade educativa terán un especial protagonismo, coa charla teatralizada A violencia nos videoxogos, para o alumnado do IES Fontexería e o IES As Insuas, e a charla Desconecta a violencia: o perigo está en liña, en colaboración con ADISBISMUR para o alumnado do IES As Insuas.
O 25N instalarase no Curro da Praza un punto de sensibilización, en colaboración con ADISBISMUR e a Deputación da Coruña, e haberá unha concentración ás 12:00 horas.
Para pechar a programación, unha nova edición do Café Feminista o 29 de novembro no local de Agrovello, Tal, co tema A violencia psicolóxica. Contará coa intervención de Aurea Brea.
