O alcalde de Noia, Francisco Pérez, e o voceiro do BNG, Ricardo Suárez, veñen de anunciar unha modificación temporal da circulación nas rúas Travesía e Corredoira Luís Cadarso, coa finalidade de mellorar o tráfico e reducir os atascos que se viñan producindo na rúa Besteiros, na baixada do Instituto Virxe do Mar.
A medida, que entra en vigor de inmediato, permitirá, de xeito transitorio, a incorporación á rúa Santísima Trinidade, retirando a coñecida maceta que impedía este acceso. Deste xeito, facilítase a comunicación coa zona de San Lázaro sen ter que dar a volta completa á vila.
Así mesmo, establécese unha limitación de velocidade a 20 km/h, a preferencia peonil e a prohibición do paso de non residentes pola rúa Travesía entre as 22:00 e as 08:00 horas, co obxectivo de garantir a seguridade e o descanso veciñal. O inicio destas medidas irá acompañado dun dispositivo da Policía Local, co obxectivo de garantir o cumprimento e de dar seguridade ós veciños e veciñas da zona.
A modificación tamén implica un paso importante na peonalización do primeiro tramo da Corredoira Luís Cadarso, xa que o acceso dende a Carreiriña quedará prohibido. Esta vía, onde se atopan a Biblioteca Municipal e a Casa da Cultura, só poderá ser empregada por residentes para incorporarse á Carreiriña, reducindo así de forma notable o tráfico rodado nesta zona.
O alcalde de Noia, Francisco Pérez, destacou que se trata “dunha medida provisional e práctica para mellorar a mobilidade e reducir os atascos que se
estaban a producir nas horas punta”. Segundo explicou, “esta actuación permitirá aliviar a circulación mentres se finaliza o Plan Integral de Mobilidade de Noia, un proxecto co que pretendemos ordenar o tráfico, mellorar o acceso ao centro e priorizar a seguridade peonil”.
Pola súa banda, o voceiro do BNG, Ricardo Suárez, sinalou que “esta é unha actuación transitoria que conxuga os intereses da veciñanza da Corredoira e de San Lázaro, garantindo, por unha parte, a seguridade viaria dos primeiros e, por outra, un acceso máis fluído para os segundos”. Engadiu que “o plan integral que estamos a preparar analizará o conxunto da mobilidade no municipio e servirá para avanzar no camiño da peonalización, en liña co
acordado entre o BNG e o goberno municipal no pacto de investidura”.
