Este venres Noia embarcouse na aventura de promover a literatura ente a rapazada, a través da iniciativa Biblioteca no Parque, impulsada dende a Biblioteca Municipal e o Concello, a partir das 18.00 horas na Alameda. Este foi o céntrico emprazamento para o miolo da iniciativa, que consistiu en poñer ao alcance das nenas e nenos unha manchea de libros viaxeiros, no marco dunha xornada “para desfrutar coa familia da literatura, dos soños e das aventuras ao aire libre”, informaron dende a organización, que tamén puido contar con Charo Pita e co seu contacontos Da cabeza aos pés.
A iniciativa Biblioteca no Parque tamén incluíu un reparto de libros (ata esgotar existencias) e brindouse ás cativas e cativos a posibilidade de facérense socias/os da Biblioteca.
Tralo reparto fixéronse grupos e os integrantes de cada grupo leron un anaquiño do libro que lles tocou aos seus compañeiros de grupo, traballando así a lectura activa, a atención, a escoita activa, a comprensión, a memoria e a atención.
