O pasado 13 de outubro de 2025 tivo lugar unha reunión entre o alcalde de Noia, Francisco Pérez, o tenente de alcalde, Manolo Seijas, e representantes da Asociación Cabalar Serra do Barbanza, que realizará a súa presentación pública o domingo 19 de outubro a partir das 11:00 horas no Campo da Feira de Noia. Durante o encontro, os representantes municipais amosaron o seu compromiso co fomento das actividades ecuestres e co mantemento da tradición cabalar na comarca. Pola súa banda, desde a Asociación Cabalar Serra do Barbanza agradeceron o apoio recibido por parte do Concello de Noia, que está a facilitar a organización deste primeiro acto público e futuras iniciativas conxuntas.
O tenente de alcalde, Manolo Seijas, destacou que “esta colaboración permitirá desenvolver numerosas actividades ao longo do ano, reforzando a nosa tradición cabalar e dinamizando a vida social e cultural de Noia”.
A presentación da asociación incluirá interacción con cabalos para pequenos e maiores, ofrecendo unha xornada de convivencia e posta en valor do patrimonio natural e cultural vinculado ao mundo do cabalo.
Dende o Concello de Noia animaron á veciñanza a participar neste evento, que marca o inicio dunha nova etapa para a promoción das actividades cabalares na vila.
Data do evento: Domingo, 19 de outubro de 2025, dende ás 11:00 horas
Lugar: Campo da Feira, Noia
