O vindeiro luns 6 de outubro comeza a campaña marisqueira en Noia e a Concellería de Obras e a de Servizos Municipais, “para garantir o bo desenvolvemento da mesma”, puxo en marcha un plan especial de actuacións en Testal. Este plan de acción abrangue entre outras cousas a habilitación dunha zona de estacionamento, grazas á colaboración de particulares e ao uso de terreo público; a roza e a limpeza dos accesos; e a reposición de madeiras deterioradas nas pasarelas de acceso á praia. O Concello agradeceu as cesións de terreos e a colaboración da veciñanza que fixeron posíbel este plan. O tenente de alcalde, Manolo Seijas, e o concelleiro de Servizos Municipais, Abel Pan, visitaron este venres 3 de outubro a zona para supervisar os traballos e aproveitaron para desexar unha excelente campaña a todos os mariscadores e mariscadoras.
