A asociación inclusiva da nosa comarca A Creba celebrou este venres 10 de outubro, diante da Casa do Concello de Noia, un acto conmemorativo con
motivo do Día Mundial da Saúde Mental 2025, baixo o lema Compartimos vulnerabilidade, defendamos a nosa saúde mental. A iniciativa contou cunha
nutrida presenza do Goberno municipal, entre os cales se atopaba o alcalde de Noia, Francisco Pérez. Tamén estivo presente alumnado dos IES Virxe do Mar, Campo de San Alberto e o Colexio María Assumpta, así como público xeral, e estivo acompañada pola música do grupo folclórico Sons da Ría.
Durante a lectura do manifesto, Alba Allo, educadora social da entidade, destacou a importancia de visibilizar a saúde mental: “Hoxe é 10 de outubro, Día da Saúde Mental, e dende a Asociación A Creba levamos xa moitos anos reivindicando a situación da saúde mental neste día. Necesitamos darlle a importancia que se merece, porque segue a ser moi invisibilizada e fan falla máis recursos para afrontar o reto que supón”.
Explicou os porqués de ter elixido como lema, para esta xornada, Compartimos vulnerabilidade: “Elixímolo porque é un problema social e non un problema individual. Ninguén está libre de ter que coidala, e menos co contexto actual”.
Pola súa parte, o alcalde de Noia, Francisco Pérez, subliñou o compromiso do Concello coa promoción da saúde mental e coa colaboración con entidades sociais do
municipio: “É fundamental que administracións e colectivos unamos esforzos para poñer a saúde mental no lugar que merece. Desde o Concello de Noia seguiremos apoiando o labor de A Creba, que leva anos acompañando e ofrecendo recursos a persoas que precisan apoio. Este acto, no que participaron moitos mozos e mozas, demostra que a sociedade está máis concienciada e que a saúde mental é unha prioridade compartida”.
O acto formou parte dunha programación máis ampla promovida por A Creba, que inclúe charlas en centros educativos, un concurso de fotografía baixo o título Enfocando o benestar, e xornadas de achegamento aos hospitais da contorna para dar a coñecer o labor do centro de rehabilitación psicosocial e laboral (CRPL).
