A asociación inclusiva da nosa comarca A Creba está a levar a cabo a súa programación neste mes con motivo do Día Mundial da Saúde Mental.
Esta asociación, que leva 31 anos en activo prestando servizo a persoas son problemas de saúde mental e levando a cabo campañas de sensiblización, programou unha serie de accións dende os seus centros de Noia e Ribeira.
O obxectivo principal é “facer reflexionar á sociedade sobre a importancia de falar de saúde mental abertamente, reflexionar sobre os estigmas que temos e as súas consecuencias e entender a importancia de pedir axuda dende que se observan dificultades, para previr posíbeis problemas de saúde mental no futuro”.
A programación fai fincapé na poboación máis nova, levando a cabo unha campaña de sensibilización dende 1º da ESO a bacharelato nos centros IES nº1, IES Leliadoura, CRP Plurilingüe Galaxia, Colexio María Assumpta e IES As Insuas, emprazados nas localidades de Ribeira e Noia.
O 10 de outubro, A Creba levará a cabo un acto conmemorativo en Noia ás 12:00h. diante da casa do Concello, onde se vai ler o manifesto e contarán coa actuación do grupo Sons da Ría e, por outra banda, a lectura do manifesto nos dous IES de Ribeira, coa participación de todo o alumnado.
Como acción complementaria a este día, levouse a cabo unha xornada na Unidade de Psiquiatría do Hospital Provincial de Conxo (Santiago de Compostela), na que persoas usuarias da asociación achegaron a persoas ingresadas nas Unidades de Saúde Mental dos hospitais da contorna o día a día do CRPL da Creba. E, aínda por celebrarse este sábado día 11 de outubro, en Ribeira podemos participar da Andaina Solidaria que sairá ás 11:00h. da praza do Centenario cun percorrido de 4km.
Como remate deste mes da saúde mental, a comunidade de A Creba ten en activo as segundas edicións dos certames Enfocando o Benestar e Ecos da Mente. O primeiro ten como temática Compartindo a nosa vulnerabilidade, e consiste en publicar unha fotografía co cancelo #SENFILTROS nomeando á entidade, ata o 31 de outubro, sendo premiada a imaxe máis votada nas redes.
E o outro, trátase dun certame de relatos breves baseados na repercusión da dixitalización na saúde mental, con diversas categorías nas que se pode participar con textos de 1000 palabras en galego ata o día 20. A entidade comparte toda a información necesaria para a participación nas súas redes.
