Investigado como posible matricidio o crime dunha muller en Vilagarcía de Arousa. A investigación apunta a que un mozo, de 22 anos, atacou á súa nai, de 61 anos, que foi atopada boca abaixo e “entre abundante sangue”
Vilagarcía de Arousa viviu este venres un tráxico suceso que a Policía Nacional investiga como un posible caso de matricidio. Un mozo de 22 anos precipitouse desde un terceiro piso despois de, presuntamente, atacar á súa nai, de 61 anos, quen foi atopada sen vida no interior da vivenda.
O suceso produciuse arredor das 18:30 horas nun edificio da rúa Duque de Rivas. Segundo explicou o subdelegado do Goberno en Pontevedra, Abel Losada, a vítima foi localizada boca abaixo e “entre abundante sangue”.
O presunto autor resultou con lesións moi graves tras a caída e permanece ingresado en estado crítico no Hospital do Salnés, baixo custodia policial.
A investigación, que se atopa nunha fase inicial, apunta que non houbo participación doutras persoas. “Con toda a prudencia, podemos sinalar que non existen indicios de intervención de terceiros”, precisou Losada.
Ao lugar do crime acudiron efectivos da Policía Nacional e Local, así como profesionais sanitarios que atenderon ao home.
