Rexistrouse no quilómetro 37 da AC-305, preto de Palmeira, e os nenos que viaxaban no autocar foron xa levados ao seu centro escolar. O ferido foi trasladado ao centro hospitalario de referencia.
Dez minutos antes das 9 horas, o 112 Galicia tivo constancia a través de Urxencias Sanitarias de Galicia-061 dun ciclista que foi atropelado por un autobús escolar en Palmeira, Ribeira. Desde o primeiro momento confirmouse que o implicado precisaba asistencia sanitaria urxente.
De inmediato, desde o Centro Integrado de Atención ás Emerxencias activouse un operativo no que participan, ademais dos servizos sanitarios, a Garda Civil de Tráfico, a Policía Local e os servizos de mantemento da estrada.
Desde Urxencias Sanitarias informaron da mobilización do seu persoal a bordo do helicóptero medicalizado con base en Santiago.
