O Centro Cultural Lustres Rivas de Ribeira acolleu un acto organizado pola A. C. Altofalante no que se presentou o libro “Castelao, desta terra e deste tempo”, obra de Manuel Rei, dentro das actividades do Ano Castelao, que conmemora o 75 aniversario do pasamento do nacionalista galego Alfonso Daniel Rodríguez Castelao.
A vicepresidenta da entidade organizadora, Iria Casais, foi a encargada de abrir o encontro, subliñando que o obxectivo da presentación era “revisitar a vida e obra dunha das figuras máis influentes do século XX do nacionalismo galego, desde un punto de vista pedagóxico, co que se pretende esclarecer moitas das cuestións que rodean a súa figura”.
Pola súa banda, o alcalde de Ribeira, Luís Pérez, puxo en relación as reflexións de Castelao coa vixencia que conservan na actualidade, facendo especial fincapé no problema da emigración xuvenil. Lembrou a célebre estampa “En Galiza non se pide nada. Emígrase” e afirmou que “hoxe seguimos sendo un país que obriga á mocidade a marchar por falta de empregos dignos, salarios acordes ou acceso á vivenda”, engadindo que o nacionalismo galego continúa a traballar para ofrecer alternativas que permitan facer de Galicia “un país rico e con moito potencial, como acreditaba Castelao”.
Finalmente, o autor do libro, Manuel Rei, debullou o percorrido vital e artístico de Castelao, salientando o seu compromiso coas clases populares e a dimensión política inseparable da súa obra artística. “A súa arte foi sempre unha arte politicamente comprometida, ao servizo da realidade social e da defensa dunha verdadeira democracia de base popular”, afirmou. Nese sentido, advertiu contra o risco de “baleirar de contido a súa figura reducindoa só á faceta artística”, o que cualificou como unha “deturpación e neutralización do que realmente simbolizaba Castelao”.
