A Sección de Ciencia, Tecnoloxía, Natureza e Sociedade do Consello da Cultura Galega (CCG) organiza o vindeiro martes (30 de setembro, 16:15 horas) unha xornada dedicada a analizar os retos e oportunidades do marisqueo de Galicia, unha actividade esencial da identidade cultural do noso país.
A cita titúlase O marisqueo en Galicia: tradición, ciencia e desenvolvemento económico e aborda a perda preocupante de produtividade dos parques marisqueiros de Galicia por mor da contaminación, cambio climático e especies invasoras. Alicia Estévez Toranzo coordina esta sesión que xunta responsábeis de centros de investigación, universidades e administracións. Está aberta a inscrición desta cita presencial que tamén se pode seguir en directo desde a web corporativa e a canle de YouTube da institución.
Contexto
O cultivo de moluscos, xa sexa en terra ou en batea, é parte da identidade social e cultural de Galicia e constitúe, ademais, un piar económico fundamental das nosas comunidades pesqueiras. Esta práctica forma parte da imaxe consubstancial desta comunidade e de aí xorden as iniciativas para que o marisqueo sexa declarado patrimonio cultural inmaterial da humanidade pola UNESCO. De feito, o turismo mariñeiro estase a consolidar como unha das ofertas turísticas diferenciais de Galicia, na que se destaca a conexión entre a tradición e o desenvolvemento económico local.
Nos últimos anos observouse unha perda preocupante de produtividade dos parques marisqueiros de Galicia e os indicios apuntan a tres factores predominantes: contaminación, cambio climático e especies invasoras.
O obxectivo desta xornada, coordinada por Alicia Estévez Toranzo, da Sección de Ciencia, Tecnoloxía, Natureza e Sociedade do Consello da Cultura Galega, é analizar os numerosos retos (biolóxicos, ambientais, químicos) que ameazan a produción marisqueira das nosas rías, así como as accións necesarias por parte da comunidade científica e da Administración con miras á súa mitigación. Para iso contamos con prestixiosos especialistas de institutos e universidades galegos que darán conta da situación do marisqueo ante os retos do cambio global e das oportunidades para asegurar o seu futuro sostible.
