O alcalde de Boiro, José Ramón Romero, e o concelleiro de Comercio, Formación e Emprego, Roberto Lojo, acompañados do xefe do servizo de Formación de Emprego, Relacións Laborais, Traballo Autónomo e Economía Social, Alberto Linares, participaron na mañá deste 1 de setembro no acto de clausura do Obradoiro de Emprego Medioambiental Torre Goiáns IV do Concello de Boiro.
Participaron nesta formación de nove meses un total de 20 alumnos e alumnas repartidos entre as modalidades de Instalación de elementos de carpintería e Repoboacións forestais e tratamentos silvícolas. O alumnado contou cun contrato de traballo para formación e aprendizaxe a tempo completo.
As persoas participantes formáronse de xeito teórico e práctico realizando tarefas de conservación e valorización do Camiño de Santiago A Orixe ao seu paso polo termo municipal de Boiro; traballos de consolidación de frondosas en Goiáns, Abanqueiro e Valiño; mellora das faixas contra incendios en Brión; e tarefas de mellora do canle do río Coroño.
Para levar a cabo o Obradoiro de Emprego Torre Goiáns IV – Boiro o Concello de Boiro recibe da Consellería de Emprego, Comercio e Emigración da Xunta de Galicia unha subvención por importe de 411.928 euros para desenvolver talleres duais de emprego.
