O BNG de Outes, a través do seu voceiro Anxo Núñez, emitiu un comunicado crítico co PP local, agora no Concello, a quen acusa de “enlamar o debate público e insistir no seu relato de mentiras e manipulacións coa fin de xustificar a súa recente moción de censura”.
Sinálase que o PP de Outes e o seu alcalde “aproveitaron a aprobación do PEF (Plan Económico Financeiro) no último pleno ordinario, para insistir na mentira de que o Concello está nunha situación económica calamitosa e, que os gobernos que non foron da súa cor política, despilfarraron ate o punto da ruína económica das arcas municipais”.
No comunicado o BNG de Outes desmente “por completo” estas remitíndose directamente ao propio PEF, elaborado polo servizo de intervención e asinado polo propio alcalde, onde “se certifica que o resultado orzamentario axustado é de + 101.414,84 euros, que o remanente da tesourería para gastos xerais resultou de + 492.637,95 €, que o aforro neto foi de + 177.363,86 €, que o volume de endebedamento sobre ingresos correntes liquidados resultou do 11,08 % e que o cumprimento da regra de gasto tivo unha marxe de 507.239,79 €”. Estes parámetros, indica o BNG, “poñen de manifesto a situación económica do Concello, dan unha imaxe do saneamento en xeral da entidade e contribúen a acreditar que, mentres se manteñan estas circunstancias e se incidan nos criterios xerais de racionalidade e control do gasto, fundamentalmente o gasto en servizos públicos non básicos, non se porá en risco o cumprimento das regras fiscais nos anos de vixencia do presente PEF”.
No comunicado a agrupación sinala que “as medidas principais para dar estabilidade económica ao Concello xa se tomaron o ano pasado, cando estábamos nós no goberno, que son as que hoxe se recollen neste documento”, e que “o noso goberno deixou aforros por valor de 492.637,95 € e un resultado orzamentario axustado positivo de 101.414, 84 € no exercicio do 2024”.
O voceiro do BNG de Outes, Anxo Núñez Fernández, sinala que “esta actitude propagandística do Partido Popular de Outes o único que demostra é que carecen de proxecto para mellorar a vida dos outenses. Agora que son o executivo local deberían amosar responsabilidade e seriedade e traballar por construír un Outes mellor, do mesmo xeito que o facemos nós coma alternativa de goberno”.
