Este mércores 24 de setembro proseguen nas parroquias de Noia as sesións cidadás e participativas organizadas polo Concello, baixo o lema O Goberno Escoita. A nova cita serán no Local social de San Paio, a partir das 19.00 horas.
A xuntanza forma parte da serie de reunións programadas polo Concello en todas as parroquias e zonas de Noia nas que a veciñanza poderá achegar directamente ao alcalde e ao conxunto do equipo de Goberno.
Dende o Consistorio fan o seguinte chamamento: “Se vives en San Paio, esta é a túa oportunidade para coñecer de primeira man a situación do Concello, compartir propostas e resolver todas as túas dúbidas”.
As sesións comezaron o pasado 19 de setembro, cunha reunión coa veciñanza de Ousoño na que participaron representantes do novo Concello, por unha banda, e medio cento de veciños e veciñas, pola outra. No transcurso do encontro tratáronse de preto cuestións como o calendario de rozas, a limpeza, o subministro de auga para consumo doméstico ou o saneamento.
