Arde Galicia. Os montes queimáronse. Os responsables da Xunta de Galicia, principalmente o presidente e a Conselleira de Medio Rural manifestan publicamente a súa satisfacción polo enorme traballo desenvolvido nas tarefas de extinción dos incendios e de que non foron demasiado daniños para o ecosistema. O negacionismo climático e a irresponsabilidade gobernamental. Nada sobre os necesarios traballos de prevención e da xestión dos montes, en colaboración e coordinación cos diferentes Concellos e as Comunidades de montes.
Como galego, cáusanme vergoña os dirixentes políticos da Xunta de Galicia que non admiten a presunta neglixencia, a falta de medios e a precarización das brigadas de extinción de incendios así como da falta dunhas mellores condicións laborais e salariais dos bombeiros forestais e comarcais. Como poden ser contratados unicamente tres ou catro meses ao ano e cunhas retribucións que non superan o salario mínimo interprofesional. Logo, ao único que se dedican, os dirixentes autonómicos e os seus palmeiros, é a aplaudir a valentía deses profesionais, eles non queren recoñecemento desexan ter dignidade laboral.
Quen vai responder pola catástrofe ecolóxica, medioambiental e humana dos incendios, en Galicia? Os veciños, que perderon as súas casas e demais propiedades; os animais que se se queimaron nos montes ou a Conselleira de Medio Rural como máxima autoridade na xestión e protección dos recursos naturais e medioambientais da nosa terra?. En que mans estamos?…
