O Concello de Santiago conmemorou este 19 de agosto o 89 aniversario do fusilamento de Ánxel Casal, alcalde republicano da cidade asasinado en 1936 en Cacheiras tras o golpe militar. O acto institucional contou coa presenza da alcaldesa de Compostela, Goretti Sanmartín; o alcalde de Arzúa, Xoán Xesús Carril Ramos; e a alcaldesa de Teo, Lucía Calvo de la Uz, en representación das tres localidades vencelladas aos últimos momentos da vida de Casal.
Sanmartín reivindicou o legado do histórico rexedor asegurando que construír a Compostela que el soñou “non é só un xesto simbólico, senón un compromiso diario”. A rexedora subliñou que “esquecer é traizoar a quen nos fixo ser quen somos” e agradeceu o labor das entidades que manteñen viva a memoria histórica.
Durante a súa intervención, a alcaldesa puxo como exemplo desa vontade de lembrar a recuperación das esculturas románicas do Mestre Mateo, que regresarán ao patrimonio público tras unha longa batalla xudicial, así como a creación das marcas Compostela é Memoria e As mil Marías, iniciativas municipais que buscan visibilizar ás mulleres represaliadas e manter vivo o fío da historia.
O acto contou coa música do grupo Carapaus e coa presenza de representantes de asociacións de memoria histórica, concelleiros de Compostela e o reitor da Universidade de Santiago, Antonio López.
A xornada conmemorativa completouse coa participación de Sanmartín na ofrenda floral celebrada no monólito da Estivada da Ribeira, en Teo, lugar no que apareceu o corpo de Casal en agosto de 1936.
