Para mobilizar os recursos necesarios máis alá da área de referencia do concello de Vilagarcía e facilitar a coordinación durante a intervención, a Xunta de Galicia procedeu a activar o Plan Territorial de Emerxencias de Galicia (PLATERGA) en nivel 1.
O aviso recibíuse ás 11:00 horas do sábado a través da chamada dun particular ao 112 Galicia, que informou dun incendio nunha nave de material fitosanitario situada na Avenida de Pontevedra.
De inmediato, puxéronse en marcha os operativos formados polos Bombeiros de Vilagarcía, Ribadumia e Baixo Miño, efectivos do Servizo de Medio Rural, Emerxencias Vilagarcía, Policía Nacional e Local, Garda Civil e o Grupo de Apoio Loxístico (GALI), que mobilizou unha cisterna de gran capacidade para reforzar as tarefas de extinción.
Ata o momento, desaloxáronse 22 vivendas —sete delas debido ao fume e as restantes pola proximidade ao incendio—, o que afecta a entre 30 e 40 persoas. Ademais, o lume permanece controlado no seu perímetro.
Actualmente, os medios continúan traballando no lugar. A nave colapsou por completo e seguen producíndose pequenas explosións debido ao material almacenado no seu interior, pero a evolución do incendio é favorable e os valores da calidade do aire mantéñense dentro da normalidade.
