O Concello de Rianxo informou de que xa están abertas as inscricións para a XXIV Subida ao Castro Barbudo 2025. Será o domingo 7 de setembro e haberá dúas modalidades: BTT para quen goza sobre dúas rodas (XXIV edición) e andaina (VI edición) para quen prefire camiñar e respirar monte. As inscricións poden formalizarse a través da web Emesports.
O número máximo de inscricións para cada proba é de 110.
Organizan a Peña Cicloturista Castro Barbudo, coa colaboración do Concello de Rianxo. Tanto a Subida como a Andaina celebraranse o domingo 7 de setembro con saída de Campo de Pasos–Taragoña e chegada o Campo Maneiro. Arrincarán ás 09 horas. A ruta encádrase como proba de Cicloturismo-BTT/Andaina, e é un “exercicio físico con fin lúdico, turístico e cultural, o que exclúe expresamente a competición”, sinalan dende a organización.
