A noite do 18 de xullo en Padrón estivo marcada pola diversidade sonora e o entusiasmo do público coa apertura do festival Ultreia, un evento que se enmarca dentro da programación das festas do Santiaguiño. Dende os sons da Galicia ancestral ata os ritmos máis actuais da electrónica, pasando polo exotismo do Mediterráneo e a calor tropical das cumbias, a velada musical foi unha verdadeira viaxe sonora.
O encargado de abrir o festival foi Xurxo Fernandes, que, acompañado dun nutrido grupo de músicos, ofreceu un concerto cheo de forza e emoción. Co espectáculo Levaino!, Fernandes mesturou os sons da Galicia primitiva coa riqueza melódica do Mediterráneo oriental, conquistando ao público cunha posta en escena chea de cor e sentimento. O público non tardou en deixar a cadeira para bailar ao ritmo das doces paisaxes sonoras coas que o artista coruñés fixo un chamamento a lembrar sempre “o cantar da nosa terra nai”.
A continuación, chegou a quenda de O Sonoro Maxín, que comezou a súa actuación cun tema dedicado a Padrón. Os ritmos caribeños e tropicais marcaron o seu concerto, no que tamén houbo tempo para homenaxear a súa Ourense natal cunha cumbia que fixo bailar a todo o Espolón. A actuación forma parte da xira A primavera ten que ser nosa, coa que a banda rende tributo ao seu exbatería Jaime Mateo.
Ao dar a medianoite, o rock tomou o escenario da man de Five Star Service, banda local formada en 2022. O seu potente directo reuniu a moitos siareiros que gozaron do seu repertorio no paseo do Espolón.
A noite rematou coas sesións electrónicas dos DJs Matrek e Ivan Mata, que prolongaron a festa ata ben entrada a madrugada.
