Catro mozos foron rescatados esta tarde tras ter dificultades para regresar a terra cando navegaban nunha pedaleta na praia de Tanxil, en Rianxo.
O 112 Galicia recibiu o aviso dun particular ás 17:10 horas, indicando que os rapaces non conseguían achegarse á costa, xa que a forza do mar levábaos de volta cara o interior.
De inmediato, desde a sala de operacións do 112 Galicia mobilizouse a Gardacostas de Galicia e Salvamento Marítimo, ademais da Garda Civil, a Policía Local e os efectivos de Protección Civil de Rianxo.
Foron estes últimos, a bordo dunha embarcación, os que recolleron aos mozos e os trasladaron a terra, afortunadamente, sans e salvos.
