A Asociación Cultural Barbantia, entidade cultural da nosa comarca integrada polos 9 concellos da área do Barbanza, emitiu un comunicado de solidariedade e apoio coas asociacións Comisión pola Recuperación da Memoria Histórica da Coruña (CRMH da Coruña), AC Alexandre Bóveda da Coruña, AC Eira Vella de Betanzos e AC Irmáns Suárez Picallo de Sada pola paralización do procedemento de declaración BIC do Museo Carlos Maside de Sada e outras entidades.
Lembran dende Barbantia que “hai xa 15 anos que o Parlamento de Galicia acordou iniciar esta declaración BIC, sen que se tivera realizado ningunha acción ata o pasado ano 2023 coa Resolución de 1 de agosto da Dirección Xeral de Patrimonio Cultural da Xunta de Galicia, na cal incoábase o procedemento, que está a piques de caducar de non emitirse resolución expresa unha vez transcorridos 24 meses dende a súa publicación”.
Barbantia súmase ás ditas entidades para “esixir á Xunta de Galicia que resolva de xeito urxente este expediente en defensa do interese xeral e adopte as medidas necesarias para recuperar este proxecto museográfico de incalculábel valor concibido por Luís Seoane e Isaac Díaz Pardo en plena ditadura franquista”.
