O Concello de Boiro celebrou este mércores 4 de xuño unha nova sesión do Consello Escolar Municipal para avaliar os programas que se levan a cabo en materia educativa e facer fronte ás novas necesidades detectadas. O alcalde, José Ramón Romero, participou na sesión xunto coa concelleira de Ensino, Carmen Silva, e os representantes da comunidade educativa.
O Consello Escolar Municipal puxo o foco na problemática crecente das dependencias e o consumo de drogas que se detecta nos centros de ensino co obxectivo de comezar a abordala mediante as ferramentas das que se dispón como é o Proxecto EnClave, recursos persoais e técnicos. Ademais, propúxose impulsar unha Escola de Nais e Pais para favorecer o contacto entre a comunidade educativa e as familias.
Durante a sesión fíxose unha valoración do Proxecto EnClave do curso 2024/2025 co obxectivo de aplicar melloras para o programa do vindeiro curso escolar. “O proxecto EnClave é un programa vivo que debemos actualizar e adaptar en función das necesidades que se detecten por parte dos membros que forman a comunidade educativa”, recoñeceu o alcalde.
O Consello Escolar Municipal reúnese de xeito periódico durante o curso escolar para detectar e dar solución aos problemas e necesidades xurdidas no ámbito educativo. Este órgano, no que está representada toda a comunidade educativa do municipio, está en condición de ofrecer unas perspectivas de interese xeral que axuden a clarificar e resolver aquelas problemáticas detectadas no eido escolar.
