A agrupación Boiro Novo presentou unha moción para ser debatida en pleno na que se urxe ao Concello a impulsar a promoción de vivendas de protección oficial e en alugueiro social.
Na moción explican que “para a nosa asemblea anuncios coma os que fixo recentemente o alcalde, de construír 1000 vivendas en primeira liña de praia, parecen máis un convite á especulación que unha aposta para crear vivenda que permita fixar poboación no noso concello”. Pola contra, din, “o que realmente Boiro e a súa veciñanza necesita é un plan de vivenda, que impulse a creación de vivenda de protección oficial así como aumentar a oferta de alugueiro social: medidas que poñan freo o aumento dos prezos da vivenda e poñan coto á especulación dun ben de primeira necesidade protexido constitucionalmente”.
A moción inclúe os seguintes puntos:
-Primeiro.- Elaborar un plan de vivenda municipal no que se adoiten as medidas administrativas e orzamentarias necesarias para aumentar a oferta
de vivenda de protección oficial en Boiro.
-Segunda.- Que se estuden fórmulas mediante as cales sexa posíbel aumentar a oferta de vivenda en alugueiro social, ben sexa con incentivos ás persoas físicas que sexan propietarias, ben a través de penalizacións aos propietarios (especialmente entidades xurídicas) que acumulen varias vivendas baleiras. Estar pendente de excluír de calquera bonificación ou axuda institucional ás vivendas vacacionais ou á vivenda baleira.
-Terceira.- Instar á Xunta de Galicia a colaborar cos concellos para a promoción e construción de máis vivenda de protección oficial así como para
o aumento da oferta de alugueiro social.
-Cuarta.- Instar ao Goberno español a que colabore cos concellos poñendo á súa disposición o parque de vivenda da SAREB para destinar a alugueiro social e vivenda protexida e establecer un marco lexislativo estatal que regule e impida a compra de vivenda por parte de fondos voitre e especuladores inmobiliarios.
