A conselleira de Política Social e Igualdade, Fabiola García, mantivo unha reunión co alcalde de Outes, Francisco Calo, para avaliar os recursos sociais destinados ás persoas maiores e dependentes deste municipio coruñés. Durante o encontro, ambas administracións acordaron abrir novas vías de colaboración co obxectivo de mellorar os servizos sociais e a calidade de vida dos veciños.
Fabiola García destacou a necesidade de impulsar programas de envellecemento activo e saudable, especialmente nos concellos máis despoboados. Nese contexto, puxo en valor o traballo do centro de día público autonómico de Outes, que actualmente atende a uns trinta usuarios.
Ademais, a conselleira lembrou que a Xunta destina 435.000 euros ao financiamento do Bono Coidado no Fogar para 87 veciños do municipio, unha achega anual de 5.000 euros por persoa dependente que permite recibir coidados no seu propio domicilio, por parte de persoas da súa contorna.
García subliñou que o Goberno galego mantén unha estreita colaboración coas Administracións locais para continuar reforzando os servizos de atención á dependencia, ao tempo que promove iniciativas que favorezan a autonomía e o benestar das persoas maiores.
