A Asociación Ambar de persoas con diversidade funcional levou a cabo o seu programa de lecer, cultura e deportes inclusivos, un proxecto que contou co cofinanciamento da Xunta de Galicia a través dos fondos do 0,7% do IRPF, xestionados pola Confederación Galega de Persoas con Discapacidade (COGAMI).
O principal obxectivo desta iniciativa é fomentar a inclusión social das persoas con diversidade funcional mediante actividades deportivas e de ocio, promovendo a convivencia con outros axentes da comunidade. A proposta naceu da necesidade de superar a participación illada e institucionalizada, apostando por un modelo baseado na cohesión social, a autonomía e o apoio mutuo.
Durante a execución do programa, Ambar logrou beneficiar a un total de 23 persoas, ofrecéndolles espazos de interacción social, aprendizaxe compartida e participación activa en actividades como a vela, entre outras propostas lúdico-deportivas.
Desde a entidade salientan a importancia de continuar promovendo proxectos que garantan o dereito á participación plena das persoas con diversidade funcional na vida comunitaria, contribuíndo á creación dunha sociedade máis inclusiva, diversa e xusta.
