O grupo municipal do PSOE de Rianxo vén de denunciar publicamente a xestión que o goberno local, liderado por Rianxo en Común, está a realizar nas obras de saneamento e abastecemento en diferentes parroquias do municipio. Segundo os socialistas, estase a producir un “mercadeo institucional” que cualifican de inaceptable, con criterios “arbitrarios, sen base técnica nin transparencia”.
Nun comunicado difundido esta semana, o PSOE asegura que o Concello está a aplicar condicións desiguais segundo a zona: mentres en certas aldeas se executan as obras con fondos públicos e se repara todo o firme, noutras só se tapa a gabia aberta, sen acometer melloras adicionais. Tamén critican que a información ofrecida á veciñanza é “confusa, cambiante e, por momentos, enganosa”.
Desde o grupo socialista denuncian que os prezos para conectarse aos servizos varían en función da presión veciñal. “Dá a sensación de que o método do alcalde é lanzar primeiro unha cifra alta, por se cola, e, se vén a queixa, rebaixala”, afirman, acusando ao executivo de “xogar coa boa fe da veciñanza”.
O caso da Devesa, na parroquia de Asados, é outro dos puntos destacados pola oposición. Segundo o PSOE, esta zona ía ser incluída nos traballos xunto coa Marquesa, pero finalmente quedou fóra sen explicacións, a pesar de contar cunhas condicións técnicas favorables para a obra. “O alcalde debe explicar por que se priorizan unhas zonas sobre outras”, esixen.
Os socialistas reclaman “transparencia total, igualdade de trato e un modelo de xestión rigoroso”, e acusan tamén ao Partido Popular de ser “cómplice” desta situación por apoiar os acordos en Xunta de Goberno Local. Ao seu xuízo, estase a xerar unha “grave perda de confianza nas institucións” e un “claro menosprezo á veciñanza”.
