O novo programa educativo de VEGALSA-Eroski, a iniciativa Capitán Mareas, chegou na mañá deste 8 de maio á Lonxa de Ribeira para promover o consumo de produto do mar e dar a coñecer a actividade pesqueira local entre os máis novos da contorna.
Un total de 39 alumnos de 3º e 4º de primaria do CEIP Plurilingüe de Frións tiveron a oportunidade de coñecer o traballo da frota pesqueira da Confraría de Pescadores San Pedro xunto a Fernando Carreira García, director da Lonxa, co apoio do GALP Ría de Arousa e o seu presidente, Miguel Ángel Iglesias.
Ademais, os escolares aprenderon sobre a importancia de levar unha dieta equilibrada cociñando eles mesmos a súa propia receita de lirio acompañados dos chefs galegos de A Artesa da Moza Crecha, Lolo Mosteiro e Paula Martínez.
O taller contou coa visita de Alfonso Villares, conselleiro do Mar da Xunta de Galicia, Vicente Mariño, primeiro tenente de alcalde do Concello de Ribeira, e Herminia Pouso, concelleira de Economía e Facenda; acompañados por Gabriela González, directora de Sostibilidade e Comunicación de VEGALSA-Eroski. Esta é a cuarta parada de Capitán Mareas nas lonxas galegas trala súa inauguración o pasado mes de abril en Burela, prevendo desprazarse nos próximos días a Fene (13/05), Sada (15/05), Baiona (20/05), Fisterra (22/05) e Puerto de Vega (27/05 e 28/05).
