O Concello de Boiro informou de que xa se están a desenvolver as obras de renovación do pavimento e mellora da seguridade viaria na subida de Espiñeira, unha actuación dun importe de 147.100 euros. O alcalde, José Ramón Romero, e o concelleiro de Urbanismo e Obras, Luís Ruiz, visitaron este luns 5 de maio o lugar onde se levan a cabo os traballos.
As obras que se están a levar a cabo contemplan a renovación do pavimento asfáltico en quente da totalidade da rúa no tramo que vai dende a rotonda de Cimadevila ata o acceso ao Polígono Industrial. “Esta é a principal vía de enlace entre o núcleo urbano e o polígono, así como o principal acceso ao instituto de Espiñeira, e precisaba dunha renovación para mellorar a súa seguridade tendo en conta o número de vehículos que circulan cada día por ela”, afirmou o alcalde.
Vaise realizar a reposición do pavimento asfáltico en quente cun espesor de 5cm, instalación de gardaraís nas beiras sen protección da subida con proteccións específicas para motos e pintura viaria para completar a seguridade viaria do tramo.
Esta actuación conta co financiamento da Deputación da Coruña mediante o Plan de Obras e Servizos (POS+).
