A programación do Mes das Letras do Concello de Muros comezou no IES As Insuas e o IES Fontexería, que acolleron esta semana obradoiro Onte e hoxe: Pandeireteiras, da man de Sara Fraga, e que serviu de homenaxe ás mulleres que mantiveron viva durante séculos a tradición oral e musical de índole popular.
“As pandeireteiras e as cantareiras, mulleres que mantiveron viva a tradición da poesía popular oral, son protagonistas este ano do Día das Letras Galegas”, lembrou a concelleira de Lingua e Ensino, Laura Rivadeneira, “e queremos como o ano pasado levar as Letras Galegas aos centros de ensino de Muros”.
“O legado da música e a poesía popular que se centra na tradición das pandeireteiras debe transmitirse de xeración en xeración”, afirmou a alcaldesa, María Lago, que agradeceu “o interese da comunidade educativa de Muros polas actividades do Mes das Letras”.
Programa do Mes das Letras en Muros
O Mes das Letras Galegas e a XVII Mostra de Teatro Xosé Agrelo inclúen este ano numerosas actividades para todas as idades dirixidas a celebrar a nosa lingua e a nosa cultura. Logo de varias citas culturais moi relevantes nos primeiros días de maio (incluída unha conferencia, este xoves 8, do muradán Henrique Monteagudo, presidente da RAG; e unha obra de teatro este venres 9 a cargo do Grupo de Teatro Terra de Outes: O doente imaxinario) celébranse as seguintes representacións teatrais no Centro Cultural e Xuvenil: O mestre de O Xeito Teatro (o 10 de maio ás 20.30h) e O espantallo da ANPA Ricardo Tobío (o luns 12 ás 11h). O martes 13 haberá un concerto de Brais das Hortas ás 11 (tamén no Centro Cultural e Xuvenil) e o mércores 14 representaranse as funcións teatrais Os viaxeiros do tempo e En efectivo ou con tarxeta, da asociación inclusiva local ADISBISMUR (ás 11.30 horas no Centro Cultural e Xuvenil).
O xoves 15 Talía Teatro representará Bicos con lingua no Centro Cultural ás 11.00 e ás 12.30 horas, e o venres 16 será a quenda de Aquelando Teatro, que achegará ao público muradán As piratas de Monte Louro (ás 11.00 horas). Na mesma xornada do venres, a Biblioteca Municipal acollerá o contacontos O corpo contado de Charo Pita, ás 18.00 horas. Polo serán, na antiga Fábrica de Sel presentarase o libro Sentinelas no limiar das tebras, de Alexandre Senande, ás 20h. Un pouco máis tarde, o Centro Cultural e Xuvenil servirá de escenario para a peza teatral Segredos de familia e licor café, da Asociación Teenses pola Igualdade.
O 17 de maio, Día das Letras Galegas, o Concello participará no acto da ofrenda a Xosé Agrelo ás 13:30 horas na Alameda de Esteiro, organizado pola AC O Xeito. Actuará Mamá Cabra, co espectáculo Ondamini. Esa xornada rematará cunha foliada na Praza do Mercado, organizada pola ACRD Praia do Castelo.
O domingo 18 haberá un contacontos en San Francisco de Louro (Cantareiras. A poesía popular nas Letras Galegas 2025, ás 17.30 horas) e unha peza teatral no Local Social da SCRD Esteirana: Castelao, un corazón á intemperie Fantoches Baj, ás 18h.
