A Piscina Municipal de Noia e máis o Campo de Fútbol Julio Mato foron obxecto de diversos ataques en diferentes elementos das instalacións na madrugada do pasado martes, perpetrados por persoas que están pendentes de identificar e co obxectivo de levaren material deportivo ou doutra índole do interior das dúas infraestruturas.
Dende o Concello compartiron un comunicado no que manifestan “o total rexeitamento do Goberno local a este tipo de comportamentos que prexudican a todos os veciños e veciñas, especialmente aos que fan uso diario destas instalacións deportivas”.
A Garda Civil xa está a traballar na identificación dos culpábeis e dende o Concello confían en que axiña sexan depuradas as responsabilidades.
O Concello agradeceu aos traballadores de recollida de lixo e a unha parella anónima que paseaba pola contorna a axuda prestada. Tamén agradeceu a colaboración da traballadora de limpeza que se atopaba neses momentos nas instalacións.
