O Concello de Rianxo conmemora este venres 25 de abril o 50 aniversario da coñecida como Revolução dos Cravos, no día (unha xornada coma esta do 25 de abril hai xa medio século) no que o pobo portugués recuperou de xeito pacífico a liberdade após 48 anos de ditadura: “Unha data que representa a unidade na defensa da democracia e a xustiza social”, en palabras do Concello.
O Cuartel Vello de Rianxo vai acoller este venres 25 de abril a tradicional homenaxe do pobo de Rianxo á Revolução dos Cravos de Portugal (Revolución dos Caraveis). A XI convocatoria para cantar o Grândola celebrarase esta sexta feira, venres, ás 20.30 horas e terá novamente formato de encontro musical, conmemorativo e aberto, coa participación de Helena de Afonso, José Lara e Orjais.
Como lembraremos, tal día como este 25 de abril trunfou no país irmán, Portugal, a Revolução dos Cravos, que, impulsada polos capitáns do Exército, puxo fin a décadas de ditadura (en 1974) cunha revolución pacífica e solidaria na que as flores (os caraveis ou cravos) e a música de Zeca Afonso foron os principais estandartes.
O encontro deste venres en Rianxo será aberto a todas as persoas interesadas en participar, sen necesidade de inscrición previa.
