Este sábado 26 de abril, ás 12:30 horas, as familias de Muros, a través da ANPA do CEIP Ricardo Tobío e co apoio doutras ANPAS e asociacións do municipio, e tamén do Concello e da alcaldesa María Lago, convocan unha concentración no Curro da Praza baixo o lema: Muros quere pediatras.
A mobilización xorde ante a crecente preocupación pola falta de atención pediátrica estábel no municipio, unha situación que, segundo indican os veciños e as entidades convocantes, “pon en risco a saúde e o benestar dos nenos e nenas da zona”.
As familias reclaman solucións urxentes por parte das autoridades sanitarias para garantir unha cobertura pediátrica digna e continuada.
Con esta concentración, as organizadoras queren visibilizar un problema que, segundo din, “afecta a toda a comunidade e esixir respostas claras e compromisos firmes”. Animan a toda a veciñanza a participar e apoiar “esta causa común, vital para o presente e futuro da infancia en Muros”.
