O Auditorio de Rianxo vai acoller o venres 11 de abril e o sábado 12 a representación de Guerra, obra de Teatro do Noroeste escrita por Eduardo Alonso que, como se indica no seu nome, ofrece unha reflexión actual sobre as contendas mundiais que asolan repetidamente o mundo levando por diante vidas, futuro e esperanza. “A guerra”, adiantan, “é a expresión cruel do fracaso total, por iso nunca é unha solución, senón o máis grande dos erros”. Será ás 21.00 horas do venres e ás 20.30 do sábado 12. Trátase dunha peza para persoas maiores de 14 anos. A entrada será de balde até completar capacidade, con retirada de convites dende unha hora antes do comezo da función.
A función do venres contará cunha posfunción cun coloquio co equipo e o elenco.
A peza sitúanos nun edificio teatral totalmente destruído por un bombardeo nunha guerra desatada no mesmo corazón de Europa, cando comezan a aparecer as personaxes do Teatro Universal que nel foran representadas ao longo do tempo e encarnadas en dous actores e catro actrices. As innumerábeis referencias ás guerras no Teatro Europeo, desde Shakespeare até Lorca enchen a escena de evocadoras secuencias de caos e destrución.
