A Asociación de Empresarios de Ribeira fixo un primeiro balance do desenvolvemento da campaña Pascua no Comercio Local, activada para dinamizar as compras nos establecementos de proximidade durante esta Semana Santa (e tamén antes e despois das celebracións relixiosas).
Segundo fixo saber a patronal, a campaña está a resultar un éxito de participación por parte da veciñanza e, con este motivo, a asociación de empresarios decidiu que vai premiar a fidelidade da cidadanía cos seus comercios engadindo novos premios á iniciativa: cinco entradas dobres para desfrutar da actuación Tributo a Mecano, Non tes nada que perder, que se celebra o vindeiro 19 de abril no Auditorio de Ribeira. As entradas sortearanse desde este mércores 9 pola tarde ata o martes 15. Esta campaña esta co-financiada pola Xunta de Galicia.
Este sorteo encádrase como dixemos na campaña Pascua no Comercio, que se desenvolve dende o 4 até o 20 de abril, sorteando 150 euros en vales de compra, co que a patronal de Ribeira busca “incentivar as compras nos establecementos de proximidade neste tempo de Semana Santa” e, tamén, nos días previos á celebración. Con cada compra os clientes poden participar no sorteo rexistrando o seu tícket na páxina web empresariosriveira.com ou escaneando os código QR que estará presente nos carteis e flyers repartidos polos comercios e establecementos asociados.
