No caso de Cortegada e Sálvora, onde non hai transporte regular, o Parque xestionará o desprazamento e os participantes deberán aboar o prezo do billete seguindo as instrucións recibidas.
A Xunta de Galicia porá a disposición da cidadanía un total de 550 prazas para participar en rutas guiadas gratuítas polo Parque Nacional Marítimo-Terrestre das Illas Atlánticas durante esta Semana Santa. Do total, preto de 135 xa poden reservarse en liña a través da central de reservas do Parque Nacional, mentres que o resto estarán dispoñibles de forma presencial nas casetas de información das illas Cíes e Ons.
As visitas estarán dirixidas por guías profesionais e teñen como obxectivo achegar ao público o patrimonio natural e ambiental dos arquipélagos, así como aspectos destacados da súa historia. Están deseñadas para grupos reducidos, o que garante unha experiencia de calidade, máis personalizada e respectuosa coa contorna natural.
Nas illas Cíes e Ons haberá rutas guiadas todos os días, con diferentes horarios, itinerarios e contidos, abordando temas de fauna, flora, xeoloxía, paisaxe e historia. Ademais, ofreceranse rutas especiais a miradoiros os días 13, 17, 18, 19 e 20 de abril, todas elas ás 12:00 horas.
A programación tamén inclúe actividades pensadas para o público infantil. É o caso de Detectives na praia, unha proposta para nenas e nenos de entre 5 e 12 anos que lles permitirá descubrir rastros de animais e algas e coñecer mellor a vida mariña. Esta actividade desenvolverase o día 15 de abril pola tarde nas Cíes e o domingo 20 pola mañá na illa de Ons.
Noutras illas do parque tamén se ofrecen visitas temáticas. Na illa de Cortegada terá lugar o domingo 20 de abril pola mañá a ruta O segredo dun bosque no medio do mar, centrada en contidos históricos e botánicos. En Sálvora, a proposta Esculturas e lendas permitirá coñecer as súas rochas, o faro, a aldea e o pazo o mércores 16 de abril pola mañá. Neste caso, as prazas deberán reservarse exclusivamente a través da central de reservas do Parque Nacional.
Desde a Consellería de Medio Ambiente e Cambio Climático lembran que estas rutas forman parte dunha oferta habitual durante os períodos nos que hai servizo regular de transporte marítimo ás illas Cíes e Ons. Así mesmo, nas catro illas do Parque existen itinerarios sinalizados para a práctica do sendeirismo, con folletos explicativos dispoñibles tanto nas illas como na web do parque.
Para acceder ao Parque Nacional durante a Semana Santa é imprescindible adquirir un billete de barco con algunha das navieiras autorizadas. Unha vez comprado, quedará confirmada a autorización de acceso que será remitida por correo electrónico. No caso de Cortegada e Sálvora, onde non hai transporte regular, o Parque xestionará o desprazamento e os participantes deberán aboar o prezo do billete seguindo as instrucións recibidas.
As prazas para realizar estas rutas guiadas poderán reservarse unicamente a través da central de reservas do Parque.
A maiores, en todas as illas, existen itinerarios sinalizados pensados para visitantes que queiran practicar sendeirismo neste espazo natural. Cada unha destas rutas está marcada cunha cor e tanto nas propias illas como na web do parque hai dispoñibles folletos explicativos cos percorridos .
