O Concello de Rianxo conmemorará o Día Mundial do Autismo, o vindeiro 2 de abril, cunha “programación especial” orientada a reivindicar a necesidade de contribuír a mellorar a calidade de vida das persoas con trastorno do espectro do autismo (TEA) e promover a súa participación en todos os ámbitos da sociedade.
O mércores 2 celebrarase ás 17.00 horas a lectura dun manifesto no Pazo de Rianxiño e iluminarase a fachada da Casa Consistorial.
O xoves 3, ás 18.30 horas, desenvolverase un relatorio de Sandra Fernández (A ansiedade no autismo) no Pazo do Martelo e o venres 4 volverán as charlas ao Pazo de Martelo con A sexualidade e o autismo, a cargo de ASPERGA.
Estas actividades formativas e divulgativas irán orientadas aos clubs deportivos do municipio, entidades asociativas e ao conxunto da veciñanza.
O domingo día 6 de abril o municipio rianxeiro acollerá a II Andaina Solidaria da Asociación de Trastornos do Espectro Autista do Barbanza – BarbanTEA. Organiza o Servizo de Deportes do Concello de Rianxo.
