O Tribunal Supremo desestimou o recurso presentado pola acusada e confirmou a sentenza de 12 anos e medio de prisión imposta a Pilar Fernández, responsable do accidente de tráfico no que perderon a vida dous mozos en Ribeira no ano 2019.
O sinistro tivo lugar na tarde do 4 de maio, na estrada entre Ribeira e A Pobra, á altura de Palmeira. A condutora invadiu o carril contrario nunha curva e impactou frontalmente contra o coche no que viaxaban Sara e Abraham, de 28 e 29 anos, respectivamente, que faleceron no acto. As probas demostraron que a acusada conducía baixo os efectos do alcol e fármacos, ademais de superar en 60 quilómetros por hora o límite permitido na vía.
A sentenza considera probado que, antes do accidente mortal, a condutora xa puxera en risco a vida doutros usuarios da vía. “Non só se xulga a morte dos dous mozos, senón que quedou acreditado que a acusada era consciente do perigo que xeraba”, explicou o avogado da acusación, Ramón Siaba.
O caso senta un precedente legal ao cualificar o delito como homicidio doloso en lugar de imprudencia temeraria, o que conleva penas máis severas. Mentres que a imprudencia temeraria podería ser castigada cun máximo de catro anos de prisión, o homicidio doloso pode acadar os 15 anos.
Ademais da pena de prisión, a sentenza inclúe a prohibición de conducir para Pilar Fernández durante oito anos. A acusación solicitará medidas cautelares para garantir que a condenada non eluda a xustiza antes do seu ingreso en prisión.
As familias das vítimas expresaron a súa satisfacción coa resolución xudicial. “Non buscan vinganza, senón xustiza, e consideran que esta sentenza a representa”, concluíu p avogado.
