O Conservatorio de Ribeira compartiu este 25 de marzo a súa axenda formativa para o vindeiro trimestre. Á presentación asistiron a concelleira de Educación, Cruz Rivadulla, o director do Conservatorio, Álvaro López máis o profesor de saxofón e xefe de estudos do Conservatorio, José Fungueiriño. A concelleira sinalou que “dende o Conservatorio Municipal estanse a facer mancheas de actividades, tanto propias como de colaboración con outros conservatorios, convidando a profesores de sona internacional e facendo unha interesante programación de audicións á que invitamos á veciñanza asistir”. Rivadulla rematou agradecendo o traballo de profesores e docentes.
O director do Conservatorio comezou anunciando “que hoxe mesmo levamos a cabo unha actividade fóra do centro, trátase de que o alumnado do departamento de piano vai participar hoxe nun concerto que organiza o Conservatorio Mayeusis, o alumnado do noso centro visitará Pontevedra para, xunto co alumnado do citado centro, ofrecer o primeiro dos concertos deste intercambio”. Dito intercambio leva varios anos desenvolvéndose, concretamente dende o curso 21/22.
López tamén anunciou o Obradoiro de Preparación para o ingreso no Conservatorio que está dirixido a nenos e nenas de 8 a 14 anos (cumpridos neste ano) e que queiran facer a proba de acceso para cursar estudos oficiais no Conservatorio de Música Profesional de Ribeira no curso 2025/2026. “O formulario de inscrición atópase na web do Concello, www.ribeira.gal, e unha vez cuberto terá que enviarse ao correo conservatorio@ribeira.gal”, engadiu.
Por outra banda Fungueiriño presentou os derradeiros encontros da Aula Galega de Saxofón. Arrinca a finais de marzo os días 29 e 30 con tres profesores. Xabier Casal, Carlos Ordóñez (artista Yamaha do cal a marca asume integramente os custos) e Roi Barros en calidade de técnico reparador que fará pequenos axustes aos saxofóns do alumnado que o precise. Continuará en abril con Elisa Urrestarazu e en maio, de novo Xabier Casal e o pianistas Takahiro Mita. As 15 prazas ofertadas na actividade está cubertas.
Para rematar e tamén coincidindo co encontro de finais de marzo do seminario Aula Galega de Saxofón levarase a cabo esta mesma fin de semana o segundo dos encontro do curso do Seminario de Música Antiga que imparte Paulo Gonçalves.
