Aínda non se cumpriron nin tres anos do remate dos traballos que remodelaron a rúa Romero Ortíz, impulsados polo anterior executivo, e xa cómpre volver investir recursos para volvela acondicionar. Os motivos son dous: o intenso tráfico que discorre por esta centra e histórica rúa de Ribeira que leva aos barrios altos de Santa Uxía (Monumento, O Queiro, O Pombal, Martín, etc) e o uso de materiais que nunca deberan ser empregados en sitios de circulación de tráfico intenso: as laxes de pedra tipo baldosa. O resultado foi que ao pouco de ser inaugurada xa presentaba importantes fochancas que comprometeron durante moito tempo a seguridade da veciñanza, con caídas de persoas rexistradas practicamente cada semana, problema que é extensíbel á contorna da farmacia do porto, no inicio da rúa Romero Ortíz, no que é difícil atopar unha baldosa que non estea rota polos vehículos. Con estes vimbios, o Goberno actual tivo que iniciar un proxecto para emendar o evidente deterioro das franxas pétreas do firme, traballos que, segundo confirmou o Concello, arrincan este mércores de marzo. A brigada municipal de obras porá o foco en substituír este embaldosado existente por formigón impreso.
Comezarase polas zonas de rúa máis anchas e para facer este traballo será necesario cortar un sentido de circulación. A rúa quedará en dirección subida (cara a Martín) no tramo comprendido entre a rotonda do Malecón e o cruzamento coa rúa Canteira, Valle-Inclán e Toxo.
O concelleiro de Obras, Xabier Vidal, detalla que con esta actuación preténdese “poñer fin, dunha vez por todas, ás roturas constantes que se producen nas franxas de pedra” e engade que “imos empregar formigón impreso que ten maior resistencia para solucionar este defecto estrutural”.
Ademais detallou que se vai tratar de calmar o tráfico coa adopción de medidas como o reforzo da sinalización ou a elevación dalgunha franxa. Vidal Peón detallou tamén que está previsro realizar unha zona de carga e descarga na zona do Malecón para facilitar que os servizos de reparto e particulares teñan onde deixar o coche un tempo e facer recados. Poderase seguir accedendo aos garaxes e os servizos de transporte como os autobuses están xa avisados pola Policía Local.
