Reabre ao tráfico con limitacións a rúa Romero Ortiz de Ribeira logo dos traballos de remodelación

As obras para instalar unha plataforma única na rúa Romero Ortiz de Ribeira, destinadas tamén a incrementar a seguridade e a accesibilidade de viandantes e condutores, chegaron estes días ao seu treito final. De feito, o Concello informou de que está previsto reabrir a rúa ao tráfico rodado a partir da media tarde deste xoves 23 de xuño. Fican, iso si, pendentes detalles por concluír que obrigarán a un novo peche a semana que vén, pero só en horario laboral: de luns a venres en horario de 7.30 a 18 horas (permitirase non obstante acceder dende o Malecón a vehículos autorizados ata as rúas Galicia e Manzanares).

Como resultado desta actuación substituíuse o aglomerado da calzada por pavimento de formigón semipulido no que se intercalaron franxas transversais de lousas de granito. A delimitación entre o pavimento de formigón da calzada e a pedra das beirarrúas tivo lugar mediante bordos de granito

Os traballos supuxeron un investimento de 119.790 euros, IVE incluído, e foron executados por Construcciones Anspal, S.L.