Este xoves 27 de marzo celebrouse unha nova sesión divulgativa encadrada nas XIX Xornadas de Información Sociosanitaria de Outes: a conferencia Proxecto Xenoma, que foi impartida polo doutor e investigador Anxo Carracedo Álvarez (USC), director da Fundación de Medicina Xenómica (SERGAS) e do grupo de Medicina Xenómica (USC). A conferencia desenvolveuse no salón de actos da Casa da Cultura da Serra de Outes, baixo unha asistencia de mais de 150 persoas.
O relator puxo o foco no Proxecto Xenoma, posto en marcha polo Goberno galego para, entre outras cousas, recompilar o ADN de 400.000 galegos e identificar variantes xenéticas de alto risco. Inclúe a detección do risco de padecer cancro de mama e ovario hereditario, así como Síndrome de Lynch, asociada, entre outros, ao cancro de colon.
A coordinación correu a cargo do Dr. Xosé Mª Dios Diz, médico especialista de Atención Primaria de Outes. Ao final do acto, o relator foi agasallado cunha figura de artesanía feita polos usuarios da asociación inclusiva ADISBISMUR Valadares (Outes).
A vindeira conferencia vai ser o 10 de abril de 2025 coa sesión divulgativa Enfermidades abdominais impartida polo doutor Manuel Barreiro de Acosta, Unidade Enfermidade Inflamatoria Intestinal do CHUS; dentro das XIX Xornadas de Información Sociosanitaria de Outes.
