O vindeiro sábado 29 de marzo, a Casa Forestal de Baroña, en Porto do Son, acollerá unha xornada arredor do mundo da madeira, organizada pola Plataforma pola Defensa do Monte dentro do proxecto Laboratorio Ecosocial do Barbanza, contando coa colaboración da Comunidade de Montes de Baroña. O encontro incluirá demostracións de maquinaria forestal, un faladoiro con profesionais do sector, exposición de artesanía e unha zona gastronómica. A programación permitirá ao público achegarse ao mundo da madeira, coñecer os seus procesos e comprender a importancia dun aproveitamento forestal que dea resposta ás necesidades de artesáns e profesionais vinculados ao sector. Dende o Laboratorio explican que un dos “pratos fortes” do evento será a participación da empresa Timber Tools, distribuidora oficial de Logosol, que se desprazará desde Valencia para ofrecer unha exhibición de maquinaria forestal, presentar as últimas novidades en serradoiros portátiles e ofrecer asesoramento técnico especializado, así como descontos exclusivos durante o evento.
Xornada de Transformación da Madeira en Baroña
Sábado 29 de marzo
Casa Forestal de Baroña, Porto do Son: Vilar, 35, 15979 Porto do Son, A Coruña
Axenda
10:00 a 12:00 h Primeiro pase: Demostración do uso de serradoiros portátiles
Coordinada por Timber Tools, distribuidora oficial de Logosol.
12:00 a 13:30 h Faladoiro con profesionais do sector da madeira Do monte á industria
Moderada por Ovidio Queiruga, presidente da CMVMC de Baroña.
Con intervencións de:
Francisco M. Romero González (Maderas Romero Cambeiro, S.L.)
Rodrigo Mosquera (TresOficios)
José Manuel Silva Ferreira (Silva Forestal)
Ramón Collazo Mosquera (Estaleiro Catoira de Rianxo)
16:00 a 18:30 h Segundo pase: Demostración do uso de serradoiros portátiles
Coordinada por Timber Tools, distribuidora oficial de Logosol.
O Laboratorio está financiado con fondos europeos grazas ao apoio da Fundación Biodiversidad do Ministerio para la Transición Ecológica y el Reto Demográfico (MITECO), no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU. A coordinación do proxecto do Laboratorio está a cargo da Fundación RIA.
Para calquera dúbida ou material adicional podemos contactar co Laboratorio Ecosocial do Barbanza a través de info@barbanzaecosocial.org.
