Este sábado 1 de marzo a parroquia de Vilacova (Lousame) convirterase nun laboratorio ao aire libre co proxecto Erasmus+ De monte a monte: territorios resilientes, unha iniciativa transfronteiriza que une comunidades galegas e portuguesas para “botar a andar formas de xestión do territorio máis resilientes fronte o cambio climático, incendios forestais e perda de biodiversidade”, segundo explican as entidades organizadoras desta xeira de traballo e divulgación.
A xornada desenvolverase na Comunidade de Montes Veciñais en Man Común de Vilacova, que a puxo en marcha como parte do seu traballo de restauración ambiental. Na parte da mañá, a vintena de participantes realizarán unha experiencia para a erradicación de acacia negra nunha zona do monte que ardeu nun incendio en 2020 e na que a comunidade está restaurando os hábitats naturais. Na parte da tarde, realizarase un bioblitz para o inventariado de avifauna, no que, a través dunha aplicación móbil específica, as persoas participantes aprenderán a identificar as distintas especies de aves presentes no territorio.
O proxecto, financiado pola Unión Europea, está co-organizado pola Fundación Montescola, Verdegaia e Veredas da Estrela, combinando xornadas práctico-teóricas, bioblitzs, formación forestal e visitas de intercambio en ambas beiras da raia galego-portuguesa.
A desta fin de semana é o primeiro dos seis bioblitzs que se organizarán en distintos espazos para o inventariado de biodiversidade, que continuarán até abril de 2026, de par de xornadas de formación e intercambios, para descubrir distintas técnicas e experiencias que fortalezan a resiliencia social e ambiental das comunidades rurais. As organizadoras explican que “o proxecto está aberto ao público en xeral e as participantes recibirán unha acreditación da formación recibida finalizado o mesmo”.
Para quen non o saiba, un bioblitz consiste nunha quedada ambiental na que as persoas congregadas teñen coma finalidade o rexistro de cantas especies vivas for posíbel identificar dentro dunha area previamente establecida.
O programa Eramus+
Erasmus+ é o programa europeo de educación, formación, xuventude e deporte para o período 2021-2027 e ten como obxectivo mellorar o desenvolvemento persoal e profesional de todos os cidadáns, reforzar a identidade europea, o crecemento sostíbel, a cohesión social e a empregabilidade das persoas.
Promove ademais o traballo de organizacións no ámbito de asociacións europeas ou internacionais cunha ampla gama de actores públicos e privados e fomenta o intercambio de coñecemento e a innovación nos ámbitos da educación, a formación, a xuventude e o deporte. O proxecto “De monte a monte: territorios resilientes” forma parte da Acción Chave 2 – Parcerías de pequena dimensión (KA-2).
