O Concello de Outes informou este venres a primeira de hora do corte de tráfico que se vai manter na rúa da Capela por mor do inicio das obras destinadas a humanizar e poñer a punto a dita vía. Os traballos, segundo explicaron fontes do Consistorio, consistirán na ampliación de beirarrúas, a mellora da capa de rodaxe e a substitución das infraestruturas de saneamento, auga, electricidade e telecomunicacións. O proxecto conta cun orzamento de 76.000 € financiados a cargo do POS+2023 da Deputación da Coruña.
Por mor das obras, o tramo sinalado na fotografía quedará cortado ao tráfico ordinario mentres duren as mesmas.
As obras prolongan e complementan o proxecto de humanización iniciado nesta céntrica rúa, que dá acceso a servizos como o Centro de Saúde, creando e ampliando beirarrúas en ambas marxes, delimitadas con bordo de granito e con baldosa de formigón vibrado granallada, “ofrecendo un espazo máis amplo e seguro para a circulación peonil”, sinalou recentemente o Concello.
O proxecto inclúe tamén a renovación da capa de rodaxe da estrada, cunha superficie total de 150 metros cadrados, e dos aparcamentos, previa demolición do pavimento actual.
