A débeda pública está de moda estes días. Quen son os propietarios da débeda do Estado? Os estranxeiros teñen un 41% da
débeda, o BCE o 28%, os bancos o 13%, as aseguradoras o 7% e os fondos de investimento, os particulares e as administracións un 2%
cada un por separado. Ou sexa, a maioría “Hermanitos de la caridad”.
No terceiro Trimestre de 2024, a débeda pública de Galicia era de 12.154 millóns de euros. A controversia que temos estes días é: quita da débeda si, quita da débeda non. Temos que ter en conta que “para reducir o déficit fiscal utilízanse políticas monetarias, como a subida de impostos e a redución das pensións”. Está moi ben que as comunidades autónomas teñan menos endebedamento e que o Estado se faga cargo, pero, teriamos que facernos preguntas como, quen vai pagar esa quita de débeda? ou en que gasta parte do diñeiro o Goberno galego? Parte dese diñeiro vaise na “administración paralela” fundacións, consorcios, axencias, empresas e sociedades públicas. Esta é a sombra que rodea ao Partido Popular de Galicia (PPdeG) e no seu
momento ao Partido Socialista (PsdeG) e BNG cando gobernaron.
Cústanos millóns de euros ao ano ás arcas de todos os galegos. Xa en 2023 o Executivo autonómico achegou 1.361,8 millóns para financiar consorcios. Desde a Unión Europea, coas directivas de 2014, e o lexislador español, coa LCSP de 2017, tentáronse erradicar estas prácticas coa idea de evitar a desviación do diñeiro público, tratos de favor e calquera outro beneficio que se poida derivar do contrato público e que non atenda o obxecto e fins do mesmo. Aquí, o Consello de Contas critica que entes paralelos da Xunta Galicia fraccionan contratos para adxudicalos discrecionalmente. O ente
fiscalizador revela todo tipo de irregularidades, froito dunha mala planificación, nos procedementos de contratación de entidades como Turismo de Galicia, SOGAMA, IGAPE, ou Augas e Portos de Galicia, etc. O presidente da Xunta, Alfonso Rueda, é “irresponsable” en crear débeda pública a base de “chiringuitos”. Malgastando o noso diñeiro para aumentar o seu poder e do partido.
Pódese perdoar esa débeda, pero non a calquera prezo, hai que reformar a Administración e recortar ese gasto político. O cidadán é o que sofre o machadazo fiscal, que nos está afundindo a todos. As políticas públicas e gastos sociais, como a educación, a sanidade ou a dependencia están en mans das súas señorías.
José Luis Calo é coordinador de UCIN Galicia.
