A conselleira de Medio Ambiente e Cambio Climático visitou esta mañá o Parque Natural para comprobar o resultado dos traballos de roza e limpeza executados
A Xunta de Galicia acometeu traballos de acondicionamento nunha superficie de aproximadamente 40.400 metros cadrados na lagoa de Vixán, situada no Complexo Dunar de Corrubedo e lagoas de Carregal e Vixán. O obxectivo desta intervención é facilitar o desaugado natural desta zona húmeda e garantir o seu bo estado ao longo de todo o ano.
Durante unha visita para supervisar os resultados dos traballos, a conselleira de Medio Ambiente e Cambio Climático, Ángeles Vázquez, destacou que esta actuación se enmarca nas labores de mantemento e conservación que a Xunta realiza periodicamente nos parques naturais de Galicia. Ademais da intervención na lagoa, levouse a cabo a limpeza de 310 metros do rego de Vixán, un espazo onde tradicionalmente se recollía carrizo para alimentar o gando, pero que na actualidade carece desa utilización.
Vázquez subliñou que esta é a primeira vez que se realiza unha intervención deste tipo na zona e anunciou que, a partir de agora, repetirase anualmente para manter a lagoa limpa e libre de vexetación que dificulte o fluxo da auga. Estes traballos contribuirán a preservar os hábitats característicos da zona húmeda e a mellorar a conservación do parque natural.
Ademais, no marco das actuacións de mellora na contorna, a Xunta vén de renovar e reparar a balaustrada do aparcadoiro do parque natural, cun investimento de preto de 49.000 euros. Segundo a conselleira, estas intervencións son clave para a protección dos espazos naturais galegos e reforzan a imaxe de Galicia como un referente en materia de paisaxe e natureza.
