O PP de Ribeira, a través do concelleiro Víctor Reiriz Lampón, presentou un rogo para ser debatido en pleno relativo ao estado no que se atopa o firme nos rueiros da parroquia de Carreira, que, segundo advirten, precisan reparacións inmediatas en varios treitos da rede local de estradas.
O Partido Popular de Ribeira aproveitou a petición para criticar a xestión do actual equipo de Goberno: “Na pasada lexislatura cansámonos de escoitar unha e outra vez o discurso de quen agora ostentan o goberno de que serían os grandes defensores das parroquias, mais na actualidade temos que facernos eco do descontento xeneralizado ante a impasividade e o desleixo deste goberno tripartito neste caso concreto na parroquia de Carreira”.
Sinálase na petición que “logo de 20 meses de goberno comprobamos como os feitos quedan diluídos fronte ás palabras, e nesta ocasión querémonos centrar nas estradas que son de carácter municipal e que se atopan nun estado no que transitar por elas convértese en perigoso”. Máis polo miúdo, o PP solicita o arranxo dos seguintes treitos:
-Campos de Arriba no seu desvío á rúa de Laxes.
-Rúa de Laxes en dirección ao Lugar de Aldea, en Castiñeiras.
-Pista de aceso ao aparcadoiro traseiro do cemiterio de Carreira – Aguiño.
